黃子華 早前落實參演 周殷廷YT 執導嘅首部電影《雨夜之徒》，近排仲不時被網民於香港唔同地方野生捕獲佢哋拍戲。而喺10月28號下午，子華同林雪被目擊喺紅磡殯儀館對出嘅馬路封街拍戲，子華戲中嘅造型亦正式曝光！
一向斯文有型嘅子華，呢次愁眉緊鎖、身形更加瘦削，睇上去既落魄又充滿倦容，一頭凌亂長髮同雜亂鬚根，著住殘舊深啡色皮褸，流露出滿滿滄桑感。而喺拍攝途中，子華突然除外套，露出左手臂大片紋身，視覺效果非常震撼。
作為新晉導演嘅YT喺現場非常認真，一場子華行去林雪方向嘅戲份，YT同子華反覆溝通，子華行完又行，全程表情嚴肅，完全投入角色之中。 
電影自落實開拍後，故事靈感有傳係同40幾年前轟動全港嘅雨夜屠夫殺人案有關，大家都好想知子華飾演嘅角色究竟係咪變態殺手？但亦有人估佢飾演受害者家屬或滄桑刑警。不過一切都要等劇組正式公布先會有真正答案，所以現時仍然充滿神秘感。
