張家輝早前接受《一周星星》訪問，話希望TVB重播《騙中傳奇》。影帝講得出，TVB就做得到！劇集將於11月2號開始，晚上11點55分喺翡翠台重播，各位觀眾千祈唔好錯過喇！家輝得知呢個消息都好開心，仲話以前重播嘅時候，自己都好鍾意睇。
而家輝主演嘅新戲票房報捷，呢日佢同蒙嘉慧、鍾雪瑩、伍允龍等演員，以及導演齊齊舉行慶功宴。家輝之前講過，如果票房過億就要裸跑，又預告過千萬會同鍾雪瑩合唱。Yoyo就話唱歌跳舞肯定都唔關佢事，家輝就叫佢講多啲嘢，不過Yoyo就話驚再發生粗口疑雲，所以唔講嘢。
Yoyo話自己當日完成宣傳活動後，同老公鄭伊健講：「哎呀，我出咗事啊！」仲話自己幾十年道行一朝喪，俾人聽錯咗。但在旁嘅家輝就好幽默，話：「錯就一定冇錯，不過冇所謂嘅大家。」至於伊健有咩反應？Yoyo就話唔記得，但老公不停笑。
講到票房福利，家輝突然歌癮起，即場嚟咗一段勁歌熱舞，點知被在場傳媒提醒唱錯咗陳小春嘅歌，令全場爆笑。轉數極快嘅家輝，即刻加碼再唱一首，點知繼續係唱錯小春嘅歌，但喺大家提醒後，最後終於唱啱一首《友情歲月》，唱到非常陶醉，令Yoyo笑到好無奈，要佢講返套戲。
至於謝票活動有冇機會請到伊健？家輝就話叫咗好耐，不過Yoyo唔準。Yoyo解釋，因為伊健係I人，所以冇得解。作為搞Gagy高手嘅家輝一聽到就即玩食字，話：「過嚟咪俾佢挨住你囉！」令大家笑得好開心。
Philip對新片票房報捷感到開心，不過聽到家輝提議裸跑謝票，似乎就唔想奉陪，仲話自己可以睇住家輝哥跑。
