JW王灝兒相隔多年再推出新歌，而呢首歌係道出佢同摯愛 王至尊 嘅愛情故事，新歌歌名取自佢哋嘅英文名簡寫「JW」。至於今次宣傳新歌嘅手法，就好似要同外界公告佢哋嘅婚訊一樣，以「派帖」方法宣布與摯愛展開人生新一頁，新歌仲要係JW同摯愛Jim Wong王至尊有份監製，真正係屬於佢哋嘅「愛情結晶品」。
為宣傳新歌，JW喺社交平台上載咗三張相，一張係佢同王至尊喺海邊平台上相擁嘅俯拍畫面，另一張就係佢身穿紅色單肩露腰晚裝嘅半身照，最後一張就係新歌嘅宣傳帖。之前有報道指JW同王至尊去年秘密喺土耳其結婚，而今次JW放出嘅照片，背景正好似喺土耳其伊斯坦堡嘅Sait Halim Pasha Mansion Venue，另外JW嘅半身單人照中，右手無名指更係戴上巨型鑽石戒指，難免令人聯想係二人嘅婚戒。而喺JW為新歌發文後，一眾圈中好友都紛紛留言恭喜，令呢次派歌更似公告婚訊一樣。
JW親解新歌創作概念：「因為我哋嘅工作會遇到好多唔同嘅挑戰，亦要面對好多唔同嘅聲音，所以知道對方一定會喺自己身邊送上無限支持嘅時候，就會覺得份外感動。至於JW2嘅意思正正係JW乘以JW，當我們互相陪伴、互相扶持嘅時候，力量遠遠大於JW乘以二，足足大一倍呢！」
JW坦言每句歌詞都代表住二人一起走過嘅日子：「最令我感動嘅歌詞係『若遇大敵 踏前抵擋 在傷痛裡 互相撐過 未怯懦』，勾起無數感動回憶，慶幸自己可以找到一個靈魂伴侶，一起走出傷痛去迎接幸福嘅未來！」
首次為廣東歌擔任監製嘅王至尊，表示最欣賞JW嘅工作態度專業又認真：「每句歌詞都令我感動不已，更加令我覺得我哋係『Power Couple』，正如歌詞『各自成了 彼此至尊』一樣！」
