張與辰 自從參加咗《中年好聲音3》之後，佢嘅歌唱事業就不斷發光發熱，除咗擁有自己嘅歌曲、舉行演唱會外，又擔任其他歌手嘅音樂總監，盡展自己嘅音樂才華。過去一年多，與辰做出嚟嘅連串亮麗成績，就獲得家鄉馬來西亞嘅肯定，日前佢喺吉隆坡一個大馬中文音樂頒獎禮上，獲頒「海外傑出表現」獎，與辰拎到獎座嘅一刻，心情都百感交集。
馬來西亞經已六年無舉行華語歌曲頒獎典禮，與辰話今次有幸上台獲獎，直言非常開心，除咗多謝大家對佢嘅支持，亦要感激自己20年來冇放棄追夢嘅理想，就係憑住堅持先可以得到獎項。與辰今次返到馬來西亞，所到之處都有粉絲守候，此行咁啱喺與辰嘅生日月，一眾粉絲當然把握機會同與辰慶祝生日。
