何超蓮同老公竇驍近年少有同框，所以不是惹來對佢地婚姻狀況嘅揣測，不過近日有套新戲就有佢地兩公婆共同參演，超蓮喺戲中犧牲靚樣，用特技化妝將自己搞到好污糟，而且只係驚鴻一瞥，超蓮話自己只有短短一分鐘戲，但就用咗三個鐘化妝，咁都可以打動超蓮，當然就係因為俾面老公啦！
超蓮呢日出席一個珠寶活動，佢著住褲裝，睇落型格又不失優雅，大部份女士都愛珠寶，超蓮當然都唔例外，佢話自己最鍾意就係耳環，而最難忘嘅就係爸爸賭王喺佢出嫁嗰陣時送上全套紅寶石珠寶，不過問到自己擁有最名貴嘅珠寶價值幾多，超蓮就話要返屋企問吓阿媽先知。
珠寶除咗貴在價值，心意都好重要，竇驍就深明此道，識得送上心頭好氹超蓮開心，不過大頭蝦嘅超蓮就大意遺失咗老公送嘅情侶手鈪，為咗補鑊，佢特登買返一隻一模一樣嘅，估唔到竟然兩度遺失，最後唯有放棄。
