應屆港姐冠軍袁絲珩以「愛眼之星」身份現身幼稚園，同小朋友玩遊戲灌輸護眼知識，身為獨女嘅Bernice自爆好鍾意小朋友，將來仲想生5、6個小朋友。以往喺主題公園任職時，Bernice經常接觸到小朋友，所以今次活動能夠見到咁多小朋友，佢都非常開心。
今年嘅萬聖節，對於Bernice嚟講係充滿期待，因為以往萬聖節正日都需要工作，今年終於可以真真正正出去玩感受氣氛。Bernice透露會扮靚靚公主，相約舊同事外出遊玩。
當選港姐冠軍兩個月，Bernice經已習慣出席各類型大大小小活動同接受訪問。問到如何保持最佳狀態時？佢話「唔使出席活動時，就盡量休息同食得健康。」佢仲話做運動都係好大幫助，近期仲可以接觸pickleball。
