杜麗莎Teresa 同 林嘉華 相識多年相當老友，兩人同樣於早年移居加拿大生活，但一直都保持緊密聯繫。日前Teresa喺加國開騷時，林嘉華亦有仗義踏台獻唱做嘉賓，嘉華哥喺台上表示Teresa一開聲，全場觀眾都聽得好陶醉，就好似比一舊攝石攝實咗一樣，全場觀眾報以歡呼和應。
而Teresa整晚一連獻唱多首金曲，包括《仍然記得嗰一次》、《何必放棄》、《開心鬼》、《眉頭不再猛皺》等，呢晚仲有Teresa嘅大女T.V. Carpio(梅天悅)都有一齊合唱，之後其中一個環節，三位女兒同台合唱《真的愛妳》送給媽媽，場面溫馨感人。
多年前嘉華哥曾因拍劇聲帶受損，之後幸得好友Teresa指導得以回復，嘉華出道初期亦曾踏足樂壇，對唱歌一直都有興趣，雖然後來以演戲為主，但都不失唱功。
