現年50歲嘅視帝 陳山聰 ，近日作客 梁靖琪 嘅網上專訪節目，大談入行32年嚟嘅心路歷程，亦破天荒公開感情世界。過往感情生活風波不斷嘅山聰，今次喺節目中毫不避諱提及當年與何超雲嘅情史，亦坦誠面對昔日錯誤與感情失敗，又提到同現任太太Apple嘅相處之道，感歎「改變唔到人就改變自己」。
陳山聰早年曾與設計師楊渡萍(Ponny）有過一段婚姻，到2011年宣布離婚，之後高調與賭王三房千金 何超雲 相戀。當時「雲山戀」轟動全港，山聰更被外界指責形象而大受打擊。呢段豪門戀情僅維持咗兩年就分手告終，而山聰事業同名聲同時跌入谷底，甚至失去友情同工作機會。
談及低谷時期，山聰坦言當時一直匿喺屋企自責，甚至覺得自己面臨「一係永遠消失，一係勇敢面對」嘅抉擇。最終佢選擇喺凌晨跑步中自我反思。後來重返TVB後，由小角色做起，拋開身邊所有閒言閒語，最終憑藉實力一步步向上爬，亦成功奪得「最佳男主角」。
經歷過感情中嘅大風大浪，山聰表示人生最感恩嘅係遇到現任太太Apple。Apple喺佢事業低谷同受盡爭議嘅時候出現，完全唔計較佢嘅過去，一直陪伴喺側。兩人於2019年結婚並育有可愛囝囝陳霆軒（Jaco）。
山聰喺節目中直言，家庭同囝囝令佢徹底改變，學識收斂脾氣、懂得感恩同珍惜身邊人。佢感歎而家所有努力都係為咗畀屋企同囝囝更好嘅未來，自己亦由過往嘅「浪子」變成「愛妻號」同好爸爸。
