側田 一連兩場萬聖節戶外騷喺西九文化區舉行，久未在港開騷令全場爆滿反應熱烈。今次側田捨棄華麗舞台及打扮，反璞歸真以沙灘、大自然為主題，營造自然感覺，又不時走近觀眾席同粉絲互動。
側田先後演唱《Forget》及《運》，隨即向現場觀眾大呼：「終於嚟到香港站！好掛住你哋呀！」隨後一口氣唱出多首代表作，包括《情歌》、《三十日》、《走音》及《男人KTV》，前奏一響起引發全場大合唱，場面震撼，同時觸發側田感性情緒爆喊：「冇諗過自己咁快會喊，真係好感動，我好掛住你哋㗎，四年啦，多謝你哋。」
回望入行20年嘅音樂路，側田話自己曾經有唔同嘅道路，亦曾經迷失，但如今重新跟隨音樂前行，唔再感到害怕。當側田唱到快歌《VOLAR》及《爽》時，粉絲們high爆一起舞動，強勁節拍加上戶外場地，令現場瞬間變身大型戶外Disco，氣氛熾熱。
側田近年旅居泰國生活，喺當地居住環境時常接觸到森林及清晨景象，因此希望將呢種自由、舒服嘅感覺帶到香港舞台，並分享自己朝早六點會喺騎樓做啲Birdcall、或者去懸崖、山崖到大嗌，然後啲雀仔、或者啲狗、雞、啲動物出晒嚟，令佢深切感受大自然神奇感覺。
