區瑞強 周國豐 作客《流行都市》分享多年來共事電台嘅點滴。兩位縱橫廣播界多年，更同麥潤壽 鄭子誠 兩位同事老友鬼鬼。Albert笑言佢哋四個加埋嘅電台開咪時間足足有180年，簡直就係一個創舉。
仲笑指如果佢哋四個一齊申請健力士世界紀錄，肯定能夠成功。周國豐就話，要靠Albert打破Uncle Ray嘅紀錄，Albert就表示打破唔到，因為Uncle Ray一個人做咗電台節目60幾年，自己做咗咁耐都只係50年。
後年就係香港廣播事業100周年，周國豐都話計劃做好傳承工作，並唔係只講懷緬，而係想同年青人分享廣播有幾正，想將廣播業嘅優點一直繼續延續落去。
Albert將會喺嚟近嘅演唱會上，翻唱多首陳百強嘅歌曲。周國豐分享媽媽都好鍾意Danny，佢相信Danny係好多長輩都想擁有嘅兒子，無論係外型、氣質定係才華，完全符合「完美兒子」。而同Danny合作無間嘅 鄭國江 都會嚟到演唱會，所以佢哋就想將Danny同鄭老師嘅作品好好傳承落去，令大家聽到呢啲精彩歌曲。