馮素波 出席粵劇慈善晚宴，不過波姐今次就唔係做表演嘉賓，而係帶住工作人員嘅身份滿場飛，波姐笑指因為呢個係慈善活動，加上自己唔識唱歌，又唔係老倌，只係老叔父，所以主辦方話見佢鍾意行來行去，就俾個工作証等佢四圍行。
波姐早前喺社交平台透露自己病倒引起大家關心，波姐話其實係自己外遊時食錯嘢，排便唔太正常，加上周身骨痛到好似鐵甲人咁，睇醫生後話佢可能內裡有啲發炎。本來打俾外國嘅阿仔想講聲佢聽，點知搞到大家好緊張，啲契仔上嚟屋企撳鐘。波姐話後來醒起自己打咗流感針有啲反應，現時已經一切冇大礙，叫大家唔洗擔心。
晚宴上，101歲嘅卿姐羅艷卿亦有現身，龍貫天同尹飛燕都話唔少粵劇界中人都好長壽，尤其係唱歌可以令心肺更健康，所以佢哋都會Keep住唱落去。
