應屆港姐冠軍 袁絲珩 當選後，俾外界形象親民又貼地，而今年嘅萬聖節Bernice雖然未有誇張打扮出門，不過就特別重返選美前曾任職嘅主題樂園「舊地重遊」，驚喜探望昔日一班戰友兼舊同事，度過一個溫馨又特別嘅周末。
Bernice以一身簡約又青春嘅粉紅色造型現身樂園，雖然低調登場，不過依然難掩港姐冠軍氣場。喺樂園遊覽期間就被不少市民認出熱情要求合照，Bernice全程來者不拒，逐一同大家拍攝毫無架子，滿面親切笑容。
除把握機會同全套造型上陣嘅舊同事敘舊打氣，，佢亦喺社交平台公開過往喺樂園任職時嘅萬聖節扮相舊照。相中可見佢當年造型極具心思，青春無敵兼眼神精靈，同目前港姐高雅氣質相比，更多咗幾分可愛同活力。
相片一公開，就獲大批網民留言，更大讚Benice：「由細靚到大！」、更指佢「飲水思源好重情義」、「萬聖節返去探舊同事真係好甜！」，更有幸運兒公開合照，讚Bernice真人比上鏡更加靚同溫柔呀。
