伍富橋與妻兒搞笑造型慶祝萬聖節 陳展鵬一家全員入戲充滿儀式感

伍富橋 同太太 梁兆楹Shirley，上月宣布囝囝Julian出世，呢對新手父母，雖然忙住湊B，不過同時都不忘慶祝吓萬聖節。Alvin就喺社交平台分享，佢哋一家三口扮鬼扮馬嘅家庭照，相中所見Alvin束起孖辮，扮演電影《怪獸公司》裡面嘅阿Boo，而太太Shirley就扮怪獸毛毛，而瞓緊覺覺豬嘅阿仔就扮大眼仔，呢個家族扮相認真搞笑。

Alvin仲寫道：「Happy Halloween from Ng’s Family。呢個阿Boo造型要係要向2021年當時仲係單身嘅伍太致敬。」Alvin更大公開當年Shirley扮阿Boo嘅鬼馬照，唔知係咪Alvin呢個舉動激嬲咗伍太，為咗補鑊佢只好公開埋自己當年扮魷魚遊戲嘅假髮造型照，真係夠晒有趣呀。 

而同樣全家上陣嘅 陳展鵬 一家三口，每年萬聖節都儀式感十足，上年佢哋扮吸血殭屍，而今年佢哋又再全員入戲，展鵬今次就扮演手捧住南瓜嘅斷頭怪人，囡囡「小豬比」就同樣營造出頭被切下放喺盤上嘅造型，真係夠晒驚嚇，至於太太單文柔就化身紅心皇后，散發住魔幻嘅氣息。 

而相對之前兩個家庭，湯怡一家就平淡少少喇，原來係因為老公 麥秋成 呢幾日要喺中環美酒佳餚活動開工，所以湯怡同囡囡就以簡單妝扮去探班，見麥QQ都有少少造型，仲準備咗糖果去現場玩Trick or treat，湯怡話麥QQ臉上嘅彩繪，其實係由佢親自畫上去，佢話囡囡仲嫌畫得太少有啲唔開心添。