相信唔少男士，面對另一半提出嘅「我今日有咩唔同呀」呢啲地獄級問題，都會滴晒汗希望搵人幫手諗點答，不過呢啲問題完全難唔到陳豪呀！呢日佢同《美食強人》嘅幾位主持 龔嘉欣 陳浚霆 及 林秀怡 作客《一周星星》時，就示範出完美答案，獲得在場眾人嘅掌聲。
myTV SUPER重溫《一周星星》精彩內容
阿Mo同太太 陳茵媺Aimee 結婚13年依然恩愛如昔，主播 許文軒 問到佢哋有咩保鮮嘅技巧？阿Mo就指佢同Aimee從來都冇嗌過交，佢哋兩人共同設立咗一個「密碼」，無論發生天大嘅事都好，只要講出個密碼，都要以大家為先，有咩唔開心都要放低，呢個係佢哋維繫關係嘅方法，不過阿Mo就話到而家佢哋都冇動用過呢個密碼。
節目中就播出Aimee想同阿Mo講嘅說話，當中佢講到從好多細節位都可以感受到阿Mo對自己嘅愛，例如Aimee話自己係一個好易蘯失路嘅人，所以如果平時佢遲過30分鐘未返到屋企，阿Mo就會即刻call佢，如果遲過一個鐘，仲會即時揸車出去搵佢，Amiee話呢份緊張係由拍拖到而家都冇變，亦好表現到佢愛嘅方式，Amiee話呢份緊張勝過所有禮物。
《一周星星》星期日晚 21:30 翡翠台