陳豪曾經喺劇集《誇世代》中大騷八塊腹肌，但其實佢喺電影《晚9朝5》入面，更試過露股演出，在場嘅 龔嘉欣同 林秀怡 聽到後即雙眼放光，仲問主播 許文軒 有冇片可以即場播畀佢佢睇！
myTV SUPER重溫《一周星星》精彩內容
講返呢套阿Mo嘅處男作，佢就話自己喺戲中除咗露股外，人生做過嘅所有事都喺晒電影入面，令兩位女士再次沸騰，仲話要返屋企搵片源嚟睇。雖然係佢人生首部電影，不過阿Mo就話太太 陳茵媺Aimee 未睇過，而嘉欣即話要搵嚟畀對方睇。
講到當年點解會肯接拍呢部電影？阿Mo話因為自己係初哥，初哥就係咩都要做，但佢話呢部電影係自己從影以來最鍾意嘅一部，幕前幕後都打成一片，拍得好開心。
不過問到而家有家室嘅阿Mo，仲會唔會接拍呢類戲？佢就講笑話自己唔介意，只係對手會介意啫。之後佢再正經咁回應，覺得演員接拍得就要投入去演，好過遮遮掩掩令觀眾睇得唔舒服。
雖然播唔到阿Mo喺電影中嘅片段，但係節目中就搵返佢當年為香港小姐又唱又跳嘅演出出嚟，阿Mo一路睇一路話都唔記得自己曾經做過呢啲「佳作」呀！睇完片後阿Mo就話相當回味，仲話自己最鍾意係跳舞，第二係唱歌，林秀怡聽到即時提議佢今年台慶要跳返part舞嚟致敬當年嘅自己！
《一周星星》星期日晚 21:30 翡翠台