驚悚電影《雨夜之徒》，近日於香港各區展開拍攝，據指新片故事靈感源自轟動一時嘅「雨夜屠夫」案，講述 黃子華 扮演嘅主角「林霧雲」服刑38年後獲釋出獄，同時社會上再度爆發作案手法極為相似嘅連環命案。
子華於新作中打破過往喜劇形象，挑戰極具陰暗面同層次嘅角色同時，亦以一身充滿年代感嘅滄桑造型，隨劇組遊走各區取景。繼日前子華同林雪現身殯儀館外拍攝後，緊接劇組又移師至佐敦知名人氣餐廳取景，吸引大批途人圍觀。
除黃子華與林雪外，近日再有網民於深水埗街頭，捕捉到影帝任達華蹤影，只見佢化上極為震撼嘅老妝現身，加上華哥深邃眼神，令角色增加唔少神秘感，亦令人更期待佢同子華交手嘅戲份。
拍攝進行得如火如荼之際，11月1日咁啱係首度執導長片嘅導演 周殷廷 37歲生日。籌備本片長達8年嘅YT，雖然生日要喺工作中度過，但一眾台前幕後工作人員就特意於緊張拍攝行程中，為佢送上蛋糕驚喜慶祝。
