黃翠如 最近正式產後復出，第一炮就飛咗去馬來西亞拍新劇，不過一去就要咁耐，最令佢掛心同最放唔低嘅，一定係佢嘅寶貝仔「蕭哈哈」喇，所以呢次佢索性帶埋「哈哈」一齊去當地開工，加上嗰邊有閨蜜兼「哈哈」嘅契媽 吳天瑜 照應，所以翠如都好放心帶埋哈哈同行，除咗有閨蜜相伴之外，劇組亦都好貼心，喺片場打造專屬BB房，等翠如可以邊拍劇邊享受湊仔樂，簡直係職場媽媽最高境界。
另一邊廂，要同老婆囝囝分隔兩地嘅蕭正楠，嚟緊因為要同馬國明、曹永廉喺廣州開演唱會，所以佢暫未有時間去大馬探班。不過阿蕭都有喺社交平台隔空抒發思念之情：「好掛住蕭哈哈，佢去咗馬來西亞陪媽媽，呢段時間訓練得很好，已經有信心可以同哈哈去旅行，再努力工作多一陣子就可以了。」之後阿蕭仲話翠如係旅遊達人，期待佢哋一家三口一齊「眼睛想旅行」。最後求生慾好強嘅阿蕭，仲寫道：「PS更加掛住條魚，漏咗呢句會好危險。」認真搞笑。
同翠如喺當地一齊拍劇嘅 黎諾懿 竟然搶先回應阿蕭嘅帖文：「差不多啦，好快返﹗」，睇嚟諾懿嗰句「好快返﹗」應該比到孤伶伶嘅阿蕭唔少安慰喇。
而契媽吳天瑜亦有喺社交平台限時動態，分享翠如帶哈哈一齊游水嘅片段，片中所見佢哋去咗當地一個好似水上樂園嘅游泳學校去玩水。翠如亦忙裡偷閑，同哈哈一齊落水玩，唔怕水嘅哈哈樂在其中，同契哥一齊玩得不亦幾乎啊﹗
