張家輝 同 鍾雪瀅 主演嘅電影《我阿爹想旅行》感動到唔少觀眾，就連自言甚少會流淚嘅 廖啟智 細仔 廖文信 ，亦表示自己被電影劇情觸動到，皆因佢話戲中充滿既視感，無論係度血氧機嘅嗶嗶聲、於病房過夜、揸車送返工等情節，都令佢好似再次經歷當年父母留院嘅情景。
文信喺社交平台分享觀後感，並指五年前佢嘅爸爸廖啟智亦想去旅行：「讀大學嗰陣得知佢好鍾意騎馬，我中學又喺蒙古騎過馬好開心，嗰時就暗暗計劃，等我畢業出嚟做嘢，儲吓錢就請佢去蒙古騎馬。點知一畢業就撞正疫情封關，佢又等唔切突然走先，呢件事成為我其中一個遺憾。」
文信指上年到媽媽 陳敏兒 想去旅行，佢指因為媽媽想睇星星，而自己喺中學時，曾經喺蒙古睇過好靚嘅銀河，於是佢就決定帶媽媽去蒙古旅行。文信指為免同一個遺憾發生兩次，所以呢次佢哋「說幹就幹」！即使過程有啲波折仲爭啲去唔到，但幸好最後都成功出發，文信喺帖文中寫道：「一大片銀河係眼前，都算係圓咗老母嘅心願。我都有去騎馬，算係代咗阿爹完成心願啦～一年唔夠，佢哋就團聚了。」
直言平日好少會分享心底話嘅文信，指《我阿爹想旅行》呢部電影令佢好有感受，佢最後附上2019年最後一次家庭旅行，父母喺澳洲大草原上嘅合照，並勸告大家：「唚氣都想講句，時間真係唔會等人，及時做應該做嘅嘢唔好拖。有啲嘢真係預計唔到，盡量唔好令自己後悔啦🤍bye! 」
