台慶劇《玫瑰戰爭》即將播出，一眾演員 楊茜堯 陳豪 陳展鵬 傅嘉莉 姚子羚等演員現身商場宣傳，吸引大批粉絲到場支持。
劇情揭露娛樂圈嘅秘辛同黑暗面，陳豪飾演嘅娛樂公司老闆同茜堯飾演嘅影后，幕前幕後都有一番角力，茜堯話劇集結合友情、兄弟情、愛情、出軌、出賣、復仇同背叛嘅劇情，仲話佢喺劇中因為忍無可忍，而誓要將真相揭開。
當主播王鎮泉問到佢：「係咪Dry住去復仇？」「有無少少滋潤？」身旁嘅阿Mo笑到人仰馬翻，仲話「唔可以濕住去復仇咩？」阿Mo嘅幽默回應引起全場哄堂大笑。 阿Mo呢位大老闆，旗下靚女無數，要掌控呢班難搞嘅女明星，都好考驗阿Mo嘅功力，阿Mo更以玫瑰嘅刺嚟形容班女明星有幾棘手呀。
展鵬今次同Kelly飾演一對，不過呢兩公婆就唔係行sweet路線，劇中兩人貎合神離，關係麻麻，但Kelly話現實同展鵬合作時，就感受到拍檔真係好靚仔，展鵬話近呢十年，好多人話佢真人靚過上鏡，原因係過往大部分時間佢都係演草根角色，唔需要著華衣美服，但原來著起靚衫，又真係可以carry到，比到觀眾另一種感覺。
劇集改編自 吳沚默 幾年前出版嘅小說，揭露明星私底下不為人知嘅一面，佢話當初諗如果公司肯拍嘅話，女演員們就可以多啲job。有份參演嘅 鄺潔楹 ，劇中角色係童星出身，形象清純，Judy講笑話自己本色出演，所以難度唔算大。
