《愛．回家之三代同糖》一眾女演員包括 車婉婉 樊亦敏 李茵彤 新加入嘅 沈可欣 羅毓儀 ，以及客串嘅 甄敏芳 穎喬 ，幾位女僕一字排開，氣勢十足。
婉婉同Amy上星期先扮古裝，今次又化身女僕，為角色真係豁出去，婉婉話佢一星期轉四個造型，而嚟緊佢哋仲會有好多造型同觀眾見面，包大家眼前一亮呀﹗
同樣係化身女僕嘅沈可欣，呢次可以加入劇組呢個大家庭，佢都覺得感覺好熟悉，亦都難掩開心興奮嘅心情。 講到著女僕裝，Yuki絕對係天花板等級，不過佢今次似乎遇到勁敵，就係第一次著女僕裝嘅Jenny，Jenny話佢開頭都有啲負擔，但慢慢都可以適應呢個裝扮。至於經常扮女僕嘅Yuki就當然非常習慣啦。有機會做音樂以外嘅工作，Jenny話自己都好感恩，而嚟緊新年佢亦會參與唔同嘅節目，但佢都好希望下年可以如願推出自己嘅音樂作品。
《愛．回家之三代同糖》星期一至五晚 20:00 翡翠台