黃夏蕙 同 邵音音 於萬聖節出席活動，兩位為應節，化身九天玄女同半人半魔鬼向途人派糖。夏蕙姨早前因為白內障而開刀接受手術，令大家相當擔心佢嘅健康，不過夏蕙姨就叫大家唔使擔心，表示做完手術後白內障同老花都冇晒，仲話而家自己叻到連對方有幾多條白頭髮都睇到。
夏蕙姨話自己做完手術當晚，已經包住紗布出騷，音音姐就指夏蕙姨完成手術後，覺得呢個世界好美麗，更加珍惜，又會繼續多接騷登台呀。
早前夏蕙姨就開生日會慶祝大壽，佢就話好開心可以見返晒啲老友，就連平時好少出門嘅黃天麗都有到場，而夏蕙姨嘅囡囡亦專程喺美國返港同佢慶祝。問到音音姐會唔會考慮下年都搞返個生日派對？佢就搞笑咁話自己雖然好鍾意熱鬧又好想搞返個party，但就擔心到時一圍人都請唔到喎。
另外，夏蕙姨早前接受節目訪問，當中細訴高調追討亡夫胡百全逾三千萬遺產嘅細節，佢指相隔多年先追討，係因為當年生活費被暫停，自己又冇錢，又申請唔到法援，所以等到而家可以請到私人律師先嚟追討。夏蕙姨指自己追討嘅全部都係由胡百全當年親自簽署及承諾嘅生活費，至於被問到會否擔心被正室子女反對？夏蕙姨就指正室個仔同大女都已經離世，所以唔擔心，佢又指若成功追討後，會將呢三千萬全數捐入慈善基金，用嚟興建護老院及做長者服務。
