胡楓 呢日大病後首次現身公開場合，獲一個頒獎典禮頒發「世界傑出華人終身成就獎」，表揚佢數十年來對演藝行業嘅貢獻，一向幽默嘅修哥呢日仲指自己的確威水，仲非常開心又榮幸，更重申自己永不言休呀。
修哥早前因身體問題曾一度昏迷留醫，消息令外界大為擔憂，呢日佢就指得上天眷顧，精神亦日漸康復，不過就略為減少同朋友間聚會喇。至於「契仔」 張家輝 早前宣佈明年新年將展開紅館演唱會，呢日修哥就指到時將直接現身現場，仲嚴詞話收唔到邀請連呢個契仔都唔要呀。
而 成龍 同 譚詠麟 呢日亦合體現身，為多年好友 曾志偉 送上「世界傑出華人獎」，更合唱《朋友》介紹老友上台。而志偉本人就指，兩位好友係自己榜樣，因為多年來兩人為大眾帶來無窮娛樂同歡笑，仲指自己於兩人面前成就小巫見大巫，自己非常榮幸。
來年係TVB成立60周年，志偉指剛好係香港回歸30周年，所以相信明年TVB節目同劇集將非常豐富，仲提到希望有機會為大家再一次帶來《獎門人》節目。而一代「獎老」 錢嘉樂 聞言亦非常高興，仲回憶多年合作片段。
影帝 梁家輝 呢日同樣係得獎人，仲一直同修哥傾唔停口，而提到過往最深刻作品，家輝就話希望可以多到大家數唔晒，仲話演藝界上下齊心，更加指要向修哥學習，一樣永不言休繼續努力呀。
頒獎禮後大會晚宴，就有多位圈中朋友現身祝賀，而《中聲4》幾位三甲唱將亦都現身娛賓。