校長 譚詠麟 開完紅館騷之後仲忙過開騷前，四圍遊山玩水不突止，仲將keep fit拋諸腦後，頻頻嘆美食，咁啱秋風起，食大閘蟹就最啱時候喇！
校長喺社交平台分享同明星足球隊搞大閘蟹宴嘅相，當中見到黃日華、趙浚承、莫家淦、衛志豪、劉洋、李金凱等隊員齊齊大快朵頤，連近日忙於同黃子華拍攝新戲《雨夜之徒》嘅任達華都驚喜現身。
席間唱家班Gary同劉洋除咗忙住食，都不忘唱歌助興，校長開心寫道：「本年度第一餐蟹宴和明星足球隊。」校長本身係大閘蟹發燒友，幾乎年年蟹季都會見到佢開心share食大閘蟹嘅相，早年更同溫拿隊友試過一晚食咗足足100隻大閘蟹，唔怪得佢會笑自己係「食物焚化爐」喇。
