鄧麗欣 近日獲 香港駐三藩市經濟貿易辦事處 邀請，飛往美國出席「夏威夷國際電影節」，Stephy以佢主演嘅代表作《金都》同即將上映嘅新片《大分瓶》亮相，出席電影放映、香港之夜同專場座談會，與當地影迷見面。兩場電影放映會反應熱烈，夏威夷影迷熱情非常，Stephy之後同佢哋逐一合照簽名，當晚現場觀眾更成為全球首批搶先欣賞到由Stephy親自填詞並主唱嘅《大分瓶》主題曲《無二分》。
Stephy坦言首播時心情緊張，幸觀眾反應熱烈，令佢大為感動：「真係好開心，喺電影節播放《金都》，雖然係好多年前嘅作品，但今次都有一個spotlight可以介紹畀大家，最搞笑嘅係有觀眾觀賞完電影《金都》後以為我嘅新歌《已經離我太遠》MV，係電影中角色阿芳20年後嘅續集，我都有解釋唔係，哈哈……兩套電影放映後大家好都熱情，最驚喜嘅係好多移居當地嘅香港人都嚟支持，原來佢哋都好留意，知我啱啱出咗碟，佢哋同我講希望有多啲香港電影喺夏威夷上映，希望可以繼續帶多啲香港電影去唔同嘅電影節，大家繼續支持香港電影！」
今次係Stephy首次到訪夏威夷，可惜因為行程緊密，未有時間享受陽光海灘，不過依然感受到當地人嘅熱情，佢更直言有機會一定會再到訪：「今次係5日4夜嘅行程，本身以為天氣唔係幾好，第一日到埗仲有少少雨。但係第二日就非常之好天，好靚嘅藍天白雲，真係感受到夏威夷嘅靚，雖然每日都有行程，冇乜點樣出去玩同感受吓大自然，但都有爭取咗少少時間去行吓街，去沙灘望吓，所以都開心嘅。」
「座談會後有朋友問我會唔會去夏威夷開演唱會，我嗰刻都有諗，今次對夏威夷嘅感覺真係好好，但冇咩時間去玩，如果真係有機會開騷就可以順便去遊覽，都幾開心！希望有朝一日參與當地嘅音樂活動。」
