G.E.M.鄧紫棋最近推出全新單曲《自由的你》，而微電影MV自上線後，成為討論話題，影片點擊已逼近200萬大關，今次以驚人電影規格製作長達10分鐘嘅影像MV，仲邀請熱播劇集《無可替代》嘅男主角 魏大勛 共同演出，呈現兩人喺「2號地球」上嘅生活。由一日三餐蛋白塊同罐頭，到培植室同睡眠艙日常，作品以沉浸感方式，引領觀眾感受「2號地球」嘅世界觀，從而走進文字小說中了解故事。
新歌《自由的你》唔止係是G.E.M.全新創作專輯嘅先發主打，亦係佢全新音樂企劃嘅起點，，由音樂、影像到全新創作科幻小說，展現佢強大決心。而小說《自由的你》11月6日起將於內地小說app開始連載。
G.E.M.同魏大勛過往一齊參與節目而建立友情，今次上演一段由暗自心動到痛心別離嘅虐心故事。MV中兩人嘅對手戲令觀眾心情起伏，其中G.E.M.嘅喊戲更觸動唔少觀眾。MV中只得G.E.M.獨白，透過製作人 李榮浩 嘅科幻感編曲，加上G.E.M.親自打造加長版配樂，令整部MV有如一部重量級科幻電影。
而繼歌曲同MV先後公開後，G.E.M.創作嘅小說《自由的你》亦即將於11月6日開始連載。前作《啓示路》剛入圍中國科幻文學最高榮譽 - 銀河獎，而今次《自由的你》再次展現佢嘅文字創作實力。MV故事係小說前傳，小說故事以星際移民作故事背景，描述一個被芯片介入的社會。
G.E.M.於自序中透露，去年《啓示路》交稿後一週，就有全新小說構想，更趁巡演空檔開始創作。去年12月超過兩星期空檔期正式動筆：「我將自己當成小說作家，規定自己每日寫一章。雖然當中有六日失敗，全書93章，我一共寫咗99日，但我已經相當滿意。巡演廣州站我都係下午準備妝髮時寫稿，晚上開騷，完騷後返房繼續寫。巡演幫我生出呢部小說，小說後來又幫我生出一整張新專輯。」
