蔡卓妍 陳家樂 同 楊天宇 呢日出席一個網球活動，佢地嘅球技分別代表三個唔同程度，家樂係初哥、Angus已經有十幾年球齡，而阿Sa就曾經半途而廢再重新pick up返，阿Sa話十幾年前已經接觸網球，但因為工作忙疏於練習，所以球技一直停留喺BB班，疫情期間更加完全荒廢，直至呢兩年喺運動高手老公鼓勵下先重新開始打波，阿Sa大讚老公球技精湛，就連對住老婆都唔留手，不過就因為球技相差太遠，所以好少同老公一齊打波。
阿Sa同Angus近排一齊拍賀歲片，部戲內容同食有關，Angus係廚師，阿Sa就係吃貨，又為食又愛批評，阿Sa因為拍戲增磅唔少，不過下個月Twins要開騷，所以佢已經開始努力keep fit，雖然依家已經唔會一味追求瘦就係靚，但就希望可以練返啲線條，有專業嘅健身教練老公督促，相信阿Sa好快可以達標啦！
