張敬軒 同 海兒 出席減碳活動，兩人輪流獻唱炒熱現場氣氛。軒仔年尾嘅澳門跨年演唱會門票一開售就被秒殺，佢預告稍後會喺香港再開騷，大家唯有聽住佢呢日演唱嘅《騷靈情歌》、《放棄的界線》止下渴先啦！
海兒呢日唱咗《風的形狀》同《友共情》，兩首都係流行曲，事後海兒話好大壓力好緊張，皆因見到軒仔在場，而軒仔就搞笑話因為自己係大前輩，所以海兒見到自己會緊張都好正常。
軒仔嘅爸爸日前突然面痺頭暈，佢即時放低工作陪爸爸入院，軒仔透露爸爸血管有少少堵塞，不過整體狀況ok，佢話爸爸係一個唔聽話嘅老人家，又唔戒口，休息唔夠又掛住玩電話，好彩平日媽媽照顧得好，只要聽醫生話好好休息，戒下口，應該好快就會康復。
