澳娛綜合澳門上葡京綜合度假村呈獻嘅《璀璨之城》進入結局周，劇情再有突破性發展，吳卓義同老婆 張曦雯 同 高海寧 喺大三巴見面，講講吓，Kelly仲激動到兜巴星高Ling。Kelly話拍劇難免會有呢啲動作場面，自己覺得最難嘅反而係心理關口，好彩大家都好專業，真正用力嗰吓一take過就完成。
估唔到轉個頭高Ling就喺戀愛巷同舊情人阿Ron嚟個深情激咀，仲直落上埋床。對於阿Ron喺劇中呢種來者不拒嘅表現，Kelly酸溜溜話阿Ron因為太有禮貌先唔識拒絕，而阿Ron就強調自己所作所為都只係劇情需要，真人絕對唔會咁樣。
劇集喺澳門實景拍攝期間，其實仲去咗好多地方，好似張智霖同高Ling傾偈嘅文化中心對出海旁都好舒服。唔知大家有冇留意到劇中亦有位真澳門人助陣，佢就係組合Soler嘅Julio，為咗角色佢特登剃咗鬚。Julio話好多謝張智霖提議搵佢演出，雖然自己中文唔多好，睇劇本有難度，但因為有足夠時間準備，所以自己都滿意表現。
《璀璨之城》星期一至五晚 20:30 翡翠台