張文慈 自從2021北上發展直播帶貨之後，就先後喺上海、廣州、深圳等地居住，但自從去年底，Pinky嘅繼母不幸離世後，佢就決定更經常返港陪伴已年屆80歲嘅爸爸，並喺早前購入啟德一個400多呎嘅兩房海景單位同爸爸一齊住。
Pinky亦喺社交平台同大家公開寓所Room Tour，身穿睡衣素顏上陣嘅Pinky表示，爸爸近年身體唔太好，經常受痛風同高血壓困擾，所以佢一直有請家傭照顧爸爸，由於居住地方有限，佢就將大房留比爸爸，自己就同家傭瞓一間房，姐姐瞓上格床，而自己就瞓下格。
Pinky話自己過往多年都有自己獨立房間，所以而家要同家傭姐姐同房share都要適應吓，佢仲講笑話夜晚除咗唔可以嘈之外，連姐姐放個屁佢自己都聞到喎。雖然有啲唔習慣，但Pinky話佢唔介意，最重要係可以陪到爸爸，即使要港粵兩邊走，都話值得。
Pinky仲話而家開始習慣留港生活，仲覺得自己越嚟越能幹，能屈能伸，咩事都搞得掂。而效力TVB一段時間嘅Pinky，亦獲公司邀請出席頒獎禮，接受「10年長期服務獎」嘅榮譽。
