嚟到年尾，又係樂壇派發成績表嘅時候，呢日一個電台舉行頒獎禮記招，一眾歌手聚首一堂，好似有 周吉佩 冼靖峰 張馳豪 MYNT魔音女團 李幸倪 泳兒 曾比特 何晉樂 馮熙燮 柯雨霏 胡子貝 涂家堯等等。
以短髮Look現身嘅Yumi令人眼前一亮，連身旁嘅 詹天文 都大讚呢個新形象好可愛，第一眼見到佢仲差啲認唔到，而Yumi就話自己一直都好想嘗試呢個髮型，所以佢都希望呢個造型可以帶比大家新鮮感。
而同樣換咗新髮型嘅曾比特，大家又認唔認到佢呢？有網民話阿Mike剪咗佢嘅招牌爆炸頭後，竟然同金馬影后 鍾雪瑩 撞樣，除咗形象有變之外，阿Mike最近連銀包都要換新，因為佢大頭蝦唔見咗銀包，搞到裡面啲證件都無晒，最可惜係當年佢嘅爆炸頭look身分證同紮辮look回鄉證都唔見晒呀。
今年首次以歌手身份出席頒獎禮嘅MYNT魔音女團，佢哋都覺得好興奮，佢哋仲預告好快會推出唱跳快歌，而家正密集式練舞。至於MV會喺邊到拍？佢哋就話暫時未知，只係知道嚟緊會去韓國工作。
今年成績唔錯嘅 黃淑蔓 就話會以平常心面對賽果，佢而家反而想專注準備佢嚟緊嘅音樂會呀。
