阮嘉敏 Mandy 憑戀愛真人騷《女神配對計劃2》人氣急升，唔少觀眾睇好對佢同求愛勇者 吳旭東 之外，亦好欣賞Mandy嘅性格同談吐，認為佢非常大方得體以及擁有高情商，加上Mandy鍾意玩社交媒體，不時就會同網民互動，展現貼地一面，因此收穫大量人氣。
Mandy喺生活中亦係一位愛寵之人，非常愛錫飼養嘅哥基犬ShuShu，早前佢為愛犬舉行簡單而隆重嘅生日會！Mandy更鬼馬用愛犬口吻撰文，分享ShuShu嘅慶生心情：「生日係咩嚟㗎？冇所謂啦有蛋糕食就得，我會繼續食好住好身體好。媽媽你繼續畀心機搵錢跑山，我會繼續做返我本分努力歎世界！」
而從Mandy分享嘅連串照片可見，佢為ShuShu嘅生日特別花心思，除咗準備狗狗可食用嘅生日蛋糕，又喺蛋糕插上印有ShuShu照片以及寫有「Happy Birthday」嘅旗仔，仲好有儀式感為愛犬戴上生日帽。
攬住ShuShu合照嘅Mandy亦笑得非常燦爛，淨係睇相都已經感受到一人一狗之間嘅嘅溫馨。唔少網民都祝ShuShu生日快樂，東東都有留言，表示：「可愛滴ShuShu生日快樂呦。」
