早前 JW王灝兒 被爆同足球隊班主 王至尊，喺去年11月已經喺土耳其秘婚，呢日JW帶住幸福肥，出席一個電台頒獎禮記招時，親證去年已經成為王太，即場收獲多位好友祝福，JW話喺合適時機選擇結婚，婚禮只邀請咗啲親密好友參加，所有覺得需要在場嘅朋友都有出現，只係 朱敏瀚 同 周嘉洛 因為拍劇而嚟唔到。JW仲話本來同老公都想低調婚事，但後來被揭露消息，於是就製作咗首新歌順帶公布喜訊。
而呢首歌更記錄咗JW同老公嘅愛情故事，甜蜜爆燈，嚟緊11月22號就係兩人結婚一周年紀念，大家都期待佢哋再有喜訊，JW坦言對造人計劃順其自然，唔會唔想，不過下年有音樂大計要實行，自己都好期待。
JW幸福滿瀉，相反最近回復單身嘅 陳康堤 ，呢日喺活動上，明顯笑容減少。康堤同網球一哥 黃澤林 戀情告終後，男方被爆火速撻着 譚旻萱 Mandy ，更有指二人交往嘅時間同康堤似有重疊，故引起外界揣測，更有指 陳奕迅 同 徐濠縈 為愛女集體取消關注黃澤林社交帳號，以行動表態支持囡囡，唔知係咪怕越描越黑，所以康堤就表明唔接受傳媒訪問。
呢日出席活動嘅仲有 陳曉東、馮允謙、李幸倪、泳兒、張馳豪、林智樂、馮熙燮、穎喬、馮允謙、陳家樂、曾比特、洪嘉豪、張天賦、魏浚笙、周殷廷、馬天佑等等。家樂成為今年角逐男新人獎最大年紀一位，佢唔單止冇覺得尷尬，仲話出到歌已經好開心，去頒獎禮則隨緣，但希望喺音樂方面越做越好。
呢日天氣最高有28度，場地陽光普照，見到Ryan重叠層次嘅衣著以及穎喬披住毛毛嘅裝束，真係望到都覺得有股熱氣，直頭好似自帶暖爐一樣呀﹗
