台慶綜藝節目《弊傢伙！有嘢唔見咗！》考驗一眾參賽者嘅記憶力，喺兩位助理 甄敏芳 同 林智樂 嘅協助下， 陳展鵬 就首次單挑大樑做綜藝遊戲節目主持，佢都覺得係一大挑戰！仲話估唔到有機會再嘗試新工作，展鵬又向好友 姚子羚 取經，子羚覺得一個人做遊戲節目主持絕對唔易，但係對展鵬有信心。
遊戲玩法會將經典電視同歷史地標等畫面，用AI抺走一部份，從而考驗大家記性。出名記性好嘅 陳豪 信心十足，揚言會勝出節目仲會獨吞獎金，而 傅嘉莉 就叫阿Mo手下留情，若果獲得獎金，會喺新劇《玫瑰戰爭》宣傳時請大家食嘢。
陳楨怡 直認對美容飲食旅遊等節目有印象之外，其他都嘢都冇印象，唯有靠隊友幫手。 黃庭鋒 都話知道賽制後同樣欠缺信心，好彩同組嘅 吳沚默 同 陳星妤 都係才女，所以就放心交畀佢哋，自己坐喺度等贏。
