又到每個星期嘅《電影泉攻略》，主持 王鎮泉 帶你緊貼最新電影資訊。
DC Studios嘅CEO James Gunn早前喺接受訪問時大方表示，距離新一代蝙蝠俠選角時間不遠，而且佢仲表示明星知名度絕對唔係選角嘅考慮重點，亦預計蝙蝠俠嘅年齡同飾演超人嘅David Corenswet唔會相差太遠，所以外間估計，應該係喺30至25歲之間。James 又話，只要人選合適，即使之前演過DC角色，佢都一樣會照用。
喺DCU之中，令大家關心嘅角色仲有由Margot Robbie飾演嘅小丑女會唔會留喺新嘅DC宇宙，James都有提及。佢話因為仲未確定小丑嘅故事，所以小丑女會唔會列入DCU正史，都係未知之數。James仲話，唔知Margot仲想唔想演呢個角色，而且Margot名氣已經比起之前更大，所以一切都要睇Margot決定，但只要Margot一句想演，佢絕對會推翻所有計劃，解釋小丑女嘅回歸。
新片速遞：
《哥斯拉-0.0》：人類嘅罪與罰已經無法歸零，戰爭將日本粉碎至「零」，哥斯拉嘅襲擊更將佢推至「負」嘅絕境。時間嚟到兩年後，人類歷盡痛苦磨難，仍堅持復甦嘅步伐，看似終於可以回歸正常生活，但呢個時候巨獸再次來襲，徹底摧毀呢份希望，將人類推向新嘅絕望深淵！
《重生2》：梁洛施主演電影，講述喺一處異國土地上，權貴隻手遮天，希拉嘅孩子成為不幸犧牲品。佢遇到同樣承受喪親之痛嘅蘇誠，兩個互不相識嘅人因為同樣傷痛而並肩而行，決心以命相搏，查明孩子受害嘅真相，向幕後罪魁佐曼、佐克父子發起復仇。隨復仇棋子一步步落下，一樁遠比想像更加黑暗、更加駭人嘅陰謀亦逐漸浮出水面。
票房龍虎榜，截至11月4號中午，第一位《善男信女》；第二位《我阿爹想旅行》；第三位《泥面人》。
