踏入年尾，又係樂壇陸續頒發成績表嘅時候，呢晚一眾歌手現身一個頒獎禮，曾譜詞創作《萬水千山總是情》、《鐵血丹心》等經典歌曲嘅 鄧偉雄 博士，喺 許冠文 手中接過「音樂成就大獎」，阿姐 汪明荃 亦盛裝出席見證鄧博士高光一刻。阿姐話當年拍劇集時，鄧博士為佢寫咗好多大受歡迎嘅經典歌曲，幾十年以來，每次開騷都會唱，《萬水千山總是情》更加係紅足幾十年。
RubberBand 獲得「最佳樂隊演繹」獎，而最令佢哋驚喜嘅事，就係由 葉世榮 頒獎。阿偉話事前唔知世榮在場，覺得非常開心。6號話廿幾年前做見習導演時，世榮曾經擔任一個短劇嘅男主角，相隔廿幾年再見，由當年自己寂寂無名嘅人，到今日喺佢手中接過獎，感覺好特別。泥鯭話讀書時日日都聽Beyond嘅歌，今次世榮出世喺身邊，好興奮。
黃淑蔓 首次參與呢個樂壇盛事，兼且有兩個獎項入圍五強，即使空手而回，但佢話自己已經好開心，會定下目標繼續努力，陳健安 同樣無諗過填詞人獎會入圍五強，因為今次係佢第二次填詞，所以躋身五強已經當贏咗。
