呂慧儀 、 張景淳 呢對「龔水」CP日前再度合體，聯同 劉展霆 一齊為《好嘢港多啲》進行拍攝，呢次都係「龔水」喺《愛・回家之開心速遞》結局後再同框。三位喺節目中會同大家介紹香港嘅供水系統，所以「龔水」絕對係玩住食字合體。
阿蟹都好開心好感恩劇集完結後，大家依然記住佢哋呢對CP，出到街都會聽到觀眾話好掛住劇中角色，而且呢次跳出11廠同大家見面，有種更親近大家嘅感覺。景淳就話雖然同阿蟹冇見幾個月，但估唔到再見返默契依然不變，代表過去十年冇白費。而劉展霆都好開心可以再同「龔水」合作，仲話好似見返師父一樣。
阿蟹主演嘅舞台劇近日喺深圳圓滿落幕，呢次亦係佢第一次演舞台劇，感覺新鮮得嚟都頗有壓力。事關呢次阿蟹要用普通話演完全劇，真係極具挑戰性。不過完結呢個演出後，阿蟹都話鍾意上演舞台劇，而且佢哋四個女主角好有緣份，連星座都係兩個處女座、兩個天蠍座，但生肖全部都係屬狗，令佢覺得好有緣份。
阿蟹工作雖然忙錄，不過佢都好注重親子時光，最近更見證囝囝蟹籽喺游水比賽奪得兩個金牌嘅殊榮。阿蟹就話，蟹籽今年12歲係最後一年可以參加賽事，所以佢就幫阿仔報名平時好少報嘅項目，而咁啱嗰啲項目好少人參加。阿蟹更向囝囝灌輸良好競賽心態，叫佢要同以前嘅個人成績比較，唔好以為人少就可以慢慢游。
至於慶祝方式，阿蟹就話囝囝好容易滿足，喺屋企打機同食薯條已經好開心。
