台慶劇《玫瑰戰爭》將於11月9號推出，一眾主演呢日以華麗裝扮現身，配合劇中角色拍攝宣傳片及海報，率先披露佢哋喺劇中人物角色。
楊茜堯 以一身高貴冷艷Look攞住獎座現身片段中，今次佢會飾演復仇者角色 夏無雙，唔只係惡女復仇咁簡單，會描述佢喺娛樂圈經歷，夾雜愛情、友情、妒忌同出賣多種情感，加上主題係講娛樂圈，同自身職業一樣，對茜堯嚟講係一個幾新嘗試。今次劇中有好幾位對手都係茜堯首度合作，而之前佢同林夏薇喺《黑色月光》中嘅角色都係講復仇，所以今次佢要更落力擺脫前身影子，帶俾觀眾耳目一新感覺。
馬國明 會同 陳豪 嚟個雙視帝合作鬥演技，雖然大家都係視帝級人馬，但馬明就激讚阿Mo演戲時好有張力，令兩人碰撞出強烈火花，直頭係嘭嘭聲一種前所未有嘅感覺。
陳自瑤 喺劇中同未合作過嘅對手碰頭感新鮮又開心，而令Yoyo覺得最幸福嘅就係有幸同阿Mo及馬明佢哋合作，因為入行以嚟同兩位雖然有同劇，但就冇演過對手戲，今次終於如願以償，可以乘機向兩大視帝偷師，並多謝監製給予機會，令佢可以同重份量級對手合作。
為咗突顯 陳展鵬 飾演嘅富家公子角色，拍攝時煎Pan可以著到大量靚衫，嘗盡少爺仔生活，同過往出演嘅角色發揮大不同，喺劇中會有好多女友，出生背景亦贏在起跑線，受過高等教育，好識睇人眉頭眼額，會見高拜見低踩。
飾演豪門新抱嘅 傅嘉莉 能夠同偶像楊茜堯合作固然開心，但喺劇中佢都有沉重嘅一面要挑戰，角色立體得嚟又好複雜，橫跨2018年時至2025年嘅經過同成長。而 姚子羚 一身中性打扮，喺劇中會夾着經理人兼藝人身份，仲會有段好精彩嘅感情線。
《玫瑰戰爭》11月9日起 20:30 翡翠台
