林芊妤 去年宣布懷有二胎，亦經歷胎兒染色體異常一事令佢近乎崩潰，好在BB女Rea健康出世。一向視一對仔女係寶貝嘅Coffee對囡囡嘅一歲生日極度重視，仲大搞生日會，被朋友形容隆重程度超越當年結婚。
Coffee喺社交平台分享連串生日會靚相以及一家四口家庭照，細說幸福之外仲有成為媽媽嘅辛酸。佢坦言自己8年前生咗大仔後，先知道慶祝小朋友生日嘅重要性，仲話「媽媽根本就係最神奇最偉大嘅魔術師」因為小朋友嘅一切都係自媽媽身體生長而成，懷孕9個月係打咗一場只有自己先知嘅硬仗。
Coffee又話：「過咗一歲就好似跨過咗一個大嘅關口，單純諗吓就已經覺得1歲生日好需要大搞特搞慶祝下，跟住再同自己講返聲，辛苦晒🥹❤️我已經做得好好同好叻架。」之後又總結第一胎經驗，發現BB一開始最需要係父母，所以決定將囡囡最寶貝嘅幼兒時間返俾自己，唔催促囡囡長大，仲好珍惜呢段親子時光，同埋要影多啲家庭相，留住一家人每個珍貴時刻。
