朱敏瀚、周嘉洛、高海寧主持嘅節目《Grand住去首爾》每集帶大家發挖韓國好玩好食嘅地方，三位先前喺宣傳記招表示對呢趟奢華之旅念念不忘。但最令朱仔深刻嘅，並唔係喺吃喝之上，而係同韓國演員金鐘國見面！
作為「力的代表」嘅金鐘國擁有健碩身形，係唔少健身人士嘅偶像，朱仔都係Fans之一。朱仔喺 拍攝時已經完全露出心心眼，仲話喺金鐘國示範做健身動作時聞到對方嘅味道。而朱仔近日就喺社交平台分享拍攝節目嘅花絮照片，第一張相就係同金鐘國嘅合照，仲有佢同嘉洛、金鐘國喺健身房嘅拍攝花絮，配文開心寫：「我係比金鐘國操過嘅男人」同埋「好香」，淨係睇字都感受到朱仔有幾咁開心。
唔少網民都話羨慕朱仔追星成功，就連吳業坤都有留言：「可唔可以幫我令佢間接操埋我」睇嚟同金鐘國健身係好多人嘅夢想。
《Grand住去首爾》星期六晚 20:00 翡翠台