衛詩雅純白仙氣造型現身 唇上傷痕當作特色記號

衛詩雅 日前坐遊艇現身維港出席護膚品牌活動，一身純白色造型仙氣十足，Michelle笑言自己好似新娘子出嫁嘅打扮一樣。

Michelle早前因拍戲受傷，令嘴唇上嘅傷口留有疤痕，經過努力治療已經康復當中，更重要嘅係Michelle有位醫美老公幫手，為佢做一啲光學療程助減退疤痕，不過做完療程後接觸陽光係大忌，活動當日陽光普照，所以佢都立刻貼上疤痕貼阻隔紫外線。Michelle話對傷痕接受，自己同老公都盡力去處理，現階段只能放鬆心情，笑指將疤痕當係自己一個特色。