台灣演員 范少勳 許恩怡 及 林熙彤 呢日現身公司結盟儀式，大會仲為11月4號生日嘅范少勳送上蛋糕補祝生日，令佢非常開心。
兩間公司結盟都代表未來多咗嚟香港工作嘅機會，少勳都喺訪問時講咗幾句廣東話介紹自己，佢仲話唔抗拒用全廣東話拍電影，因為點樣用唔同語言去詮釋作品，係演員會好想挑戰嘅事，亦會期待觀眾埋唔埋單。
少勳呢次嚟香港有機會同 古天樂 見面更得到對方鼓勵，佢都有把握機會推薦自己，因為自己好鍾意動作片，覺得好熱血刺激，亦希望將呢份刺激帶俾觀眾。
香港網球一哥黃澤林官宣同新歡譚旻萱嘅戀情後，被懷疑有無縫接軌之嫌，唔少人都戥舊愛康堤唔抵。同Mandy同公司嘅Hazel、Natalie都對事情選擇避談。面對追問Hazel就話，佢哋好少機會見面，大家都各有各忙，冇時間交流，而每段關係都有需要學習嘅嘢，所以作為外人都冇必要作評論。
講到未來最想挑戰嘅電影類型，三位都話係鬼片。Natalie希望嘗試唔同類型嘅角色同片種，尤其台灣流行鬼片，所以佢都希望有緣拍到，可以飾演被嚇嘅角色，而Hazel同少勳就反而想做鬼。少勳解釋，因為自己被嚇到好容易發噩夢，但嚇人應該唔會，而佢亦都好接受化特技妝拍戲。
