王菲 經典金曲《季候風》近期因國際巨星The Weeknd喺巡迴演唱會香港站播出，再次捲起一陣風潮，好友 劉嘉玲 亦爆料指The Weeknd曾希望邀請王菲合作演出，惜未能成事。
王菲雖已久未喺香港公開亮相，但佢標誌性嘅歌聲同高冷氣質一直令歌迷念念不忘。而隨「王菲熱」再起，佢首次演出嘅TVB經典劇集《原振俠》亦再引發網民集體回憶。
同《季候風》一樣1993年播出嘅《原振俠》，可以堪稱係集結全城顏值頂峰，劇集由天王 黎明 飾演男主角原振俠，加上匯聚港姐冠軍 李嘉欣 朱茵 洪欣 同 當年仍使用藝名 王靖雯 嘅王菲 等美女，陣容可以話空前絕後。而當年TVB資訊節目《K-100》嘅探班片段當中，擔任主持人嘅宣萱訪問首次踏足電視圈拍劇嘅王菲，為觀眾揭開女特工海棠嘅神秘面紗。
宣萱問道首次拍劇嘅佢面對咩困荃時，留住一頭俐落長髮、神采飛揚嘅王菲坦言「好多棘手嘢」，又坦言自己缺乏演戲經驗，既要唸對白又要做表情，更笑言非常緊張：「讀對白又要顧及語氣，又怕自己廣東話講得唔夠正，好多嘢要照顧！」
至於劇中飾演女特工「海棠」，佢就指角色需要打得，雖然有替身協助，但唔少動作場面仍要親身上陣，大叫辛苦。當宣萱打趣問佢角色係咪同名曲一樣「容易受傷的女人」時，王菲就笑住回應話：「表面上好堅強、打得好厲害，人好冷酷，但一遇到原振俠就鍾意咗佢，最終亦都成為容易受傷嘅女人。」
