粵劇殿堂級名伶；人稱「美艷親王」嘅卿姐 羅艷卿 日前舉行「期頤宴」，筵開20席慶祝百歲大壽，大批圈中好友親臨祝賀，包括有同卿姐同為八牡丹之一嘅好姐妹南紅、修哥胡楓、薛家燕、馮素波等，大家唱生日歌為卿姐送祝福，場面熱鬧又溫馨。
卿姐著住侄孫 謝建業 為佢全新訂造嘅大紅色刺繡禮服，睇落喜氣洋洋，「美艷親王」嘅風采完全不減當年。卿姐開心接受眾人嘅祝福同賀禮，佢話好多謝侄孫為佢籌備今次嘅壽宴，雖然自己冇兒冇女，但侄孫嘅孝心勝過親生仔。
卿姐仲話自己成日都會打麻雀，不過又自嘲「又聾又盲、走雞多過食糊」。而南紅就讚卿姐人緣好朋友多，昔日八牡丹得返佢地兩位，而最緊要就係大家繼續身體健康。
卿姐百歲大壽，好拍檔修哥送上大大擁抱兼獻吻，卿姐話自己同修哥稱兄道弟，之前修哥開紅館騷，卿姐唔止去撐場，仲坐足四個幾鐘。至於細細個就跟住卿姐拍戲嘅家燕姐，就話自己原本有其他工作安排，但就特登推晒所有工作，一定要親自來為卿姐賀壽。
