電台年度籃球比賽日前舉行，而擁有176cm身高優勢嘅 劉穎鏇 就憑佢驚艷全場嘅紮實籃球基本功同招牌親切甜美笑容，成為全場觀眾同賽後討論區熱議嘅焦點。
Tiffany以24號紅色球衣代表歌星隊亮相球場，熱身時動作就有姿勢亦有實際，運球推進流暢，更展現出極具力量同準繩度嘅跳投，喺弧頂同外圍多次出手都命中三分球，純熟嘅手感同身體協調度有如正式運動員一樣。連續投籃成功後仲不忘向鏡頭展示甜美親切笑容，自信又迷人嘅陽光氣質散發無限魅力。
其實Tiffany自細喺美國生活時就展現極高運動天份，曾為高中女子籃球隊隊員同隊長，又曾代表球隊參加加州高中聯賽獲得唔少獎項，籃球底子極為紮實。入行以來，佢更係身兼「文武雙全」特質，擁有出眾身高與勻稱身材嘅佢，演藝事業更係以「搏命」著稱——於多部劇集中都親身上陣挑戰打戲、動作場面同高難度體能訓練，專業態度獲圈內外一致好評。
今次電台籃球賽中，Tiffany就將運動員嘅硬朗英姿同女神甜美親和力完美結合，更被唔少網友形容為「真．籃球女神」咁話。