已故藝人 廖啟智 與 陳敏兒 嘅長子 廖文哲，近年致力發展音樂事業，以 DJ 身份積極參與各大小型音樂活動。日前佢同朋友於派對中相聚，由於現場氣氛相當高漲，故令文哲亦要一展舞技，豈料因為舞步過猛令佢意外骨折，結果要細佬 廖文信 凌晨三點揸車送佢入醫院治療。
廖文哲喺限時動態上公開自己腳上包上厚厚繃帶嘅照片，佢喺相中無奈又幽默地留言，指自己享受音樂時非常過癮，但無諗到「 dance with power moves（跳舞放大招）」嘅代價居然是意外骨折。
面對突如其來的傷勢，廖文哲坦言下下週即將迎來中國小型巡演，但佢依然保持樂觀心態，自嘲呢個或者係個「好兆頭」，並向關心佢嘅朋友表示：「別太擔心，我去過醫院了，很快就會康復，不過短期內恐怕不能再跳舞或耍酷了。」
除咗傷情外，廖文信亦將哥哥坐喺輪椅上於醫院嘅側拍照PO於限時動態中。相中所見，坐喺輪椅上、戴著口罩嘅文哲，一手拎住電話，而手提電腦則放於大腿上，文信特別於相中寫道：「DJ界黎生 斷腳仍要工作」，而相嘅右上角則有顯示為「3：07 AM」。事後文哲亦有轉發細佬嘅限動，並感激細佬喺半夜三更願意充當司機接送佢去醫院就診，感歎道：「都要多謝你呢位兄弟咁夜都願意車我嚟睇醫生」、「Taste of Sweet 」，展現出兄弟倆密不可分的深厚感情。
雖然一隻腳骨折，但仍冇阻文哲跳舞，佢嘅朋友於限時動態中PO出文哲單腳跳舞嘅影片，並留言表示：「bro broke his leg but never give up dancing 」片中見文哲跳得相當穩陣，睇嚟大家真係唔使擔心佢喇！
