台慶劇《玫瑰戰爭》即將首播，而一眾演員唔止今日盛裝現身迎接劇集播出，其實日前已經展開連串宣傳攻勢，先係去到中山，同一眾當地觀眾率先欣賞預告片，其中 陳自瑤 被 傅嘉莉 拉弓掌摑一幕，更係睇到大家嘩嘩聲呀。
Yoyo就解釋呢場戲中戲入面Kelly故意NG向佢摑完再摑，嚇到 楊茜堯 以為兩人面和心不和，知道係劇情先舒一口氣呀。不過Yoyo就要求Kelly唔好遷就而真打，務求效果更好呀。
而 馬國明 就指中山觀眾反應非熱烈，令佢哋大家都非常高興呀。至於 林夏薇 就預告唔少劇情都睇到自己「嘩」埋一份。而身為劇本原著作者嘅 吳沚默 就指薇薇嘅角色可以話不擇手段而編劇仲為佢安排 黃庭鋒 飾演細佬令角色更立體呀。
星期日大隊就返到香港，以電車巡遊形式宣傳新劇，茜堯仲公開獻唱近日大熱嘅《季候風》，之後又到鬧市派紀念品。而 陳展鵬 就指現場嘅圍觀朋友都非常熱情， 陳楨怡 更以印尼文呼籲家傭姐姐一齊捧場，展鵬仲指今次演出會喺Kelly同Celina之間周旋，不過就留雨情感嘅懸念，叫大家一定要留意呢段複雜關係呀。
台慶劇《玫瑰戰爭》星期一至五晚 20:30 翡翠台
