圈中唔少藝人係匹克球（Pickleball）愛好者，關楚耀、陳庭欣、黃子恆同伍富橋等呢日參與慈善賽，各人換上運動服，打起上嚟真係有板有眼，黃子恆前一晚出席台慶劇《璀璨之城》於澳門盛大舉行嘅「結局夜」，佢只係瞓咗幾個鐘，就參加呢個慈善球賽。
講到劇中演員張智霖、高海寧睇到喊晒，黃子恆都覺得好感動，佢話本身冇睇過嗰場戲，行近張智霖時，有向豎起大拇指畀個叻，黃子恆話自己啲情緒都湧上嚟，完全感受到張智霖角色嘅心態同難處，雖然張智霖嘅角色係一個壞人，作為劇集最重要係被角色嘅故事所觸動，黃子恆亦希望《璀璨之城》喺頒獎禮獲得最佳劇集，男女主角獎項都拎晒。
同場嘅伍富橋亦好唔夠瞓，近排忙於照顧剛出生嘅兒子，通咗三晚頂享受甜蜜嘅負擔，伍富橋話嚴重睡眠不足，但佢都用好多時間陪住阿仔，有感呢個時間係好珍貴，伍富橋話呢日要教班同比賽，前一晚就喺阿仔嘅喊聲當中，提早瞓着咗。伍富橋亦有上網睇啲育兒方法，親身試咗係OK，話BB喺扭食奶又未夠鐘嗰陣，伍富橋施展止哭神技，令阿仔馬上停止哭泣，仲話覺得阿仔好需要佢添！
