戀愛真人騷《女神配對計劃2》喺上星期日（8號）播出嘅水上樂園篇，除咗淘汰Tony同Mark兩位求愛勇者之外，中途加入嘅女神 梁超怡 亦成為被節目淘汰嘅首個女神，令一眾女神同求愛勇者都感到相當驚訝。
雖然超怡嘅呢段配對旅程旋風式完結，不過佢都好開心透過節目認識一班新朋友，同時睇見每個人嘅獨特亮點，更喺社交平台分享多張花絮照以及出長文分享心聲，佢話：「關於當初嘅選擇，我冇後悔過。」仲話既然決定加入，總要俾個機會自己同心中想揀嘅人認真相處。
其實超怡同屬另一位「中途加入」嘅女神 陳星妤 自喺節目亮相後，一直備受觀眾關注，有睇好亦有批評，認為兩位嘅加入非常突然。
而超怡對唔同嘅聲音亦抱持開放接受態度，佢喺文中寫道：「「中途加入」呢個身份，係過程中難免有唔同嘅聲音，但我好清楚嘅係：無論點樣做，唔同嘅聲音都一定會存在；所以我選擇聽從直覺，親身去相處、去感受，無愧於心就夠。至於會唔會覺得可惜？緣份呢樣嘢，去到邊度就邊度，順其自然就好，真係冇咩好可惜嘅。」
雖然超怡呢次未喺節目中成功配對，搵到心儀可以發展嘅男士，不過佢都充滿正能量，認為「我相信只要時間對了，有緣嘅人總會走到一起。」仲為每位女神同求愛勇者送上祝福，祝大家都可以搵到屬於自己嘅幸福 。
《女神配對計劃2》星期日晚 20:30 翡翠台