「金牌司儀」 林盛斌 同老婆 黃乙頤 結婚多年，感情一直恩愛如初，佢亦係一位積極賺錢養家嘅好爸爸，外界更傳阿Bob嘅身家已經有十億，完全係一位「隱形富豪」。
11月9號係Bob嫂嘅46歲生日，阿Bob當然有好好為老婆慶祝，不過兩位並唔係歎高級奢華浪漫燭光晚餐，而係享受「貼地的浪漫」，一齊食炸雞脾、炸大腸配埋煎釀三寶呢啲地道小食。阿Bob貼出二人「原圖直出」合照，仲好識讚老婆：「冇P圖，冇美白，冇濾鏡，46歲嚟講，佢都保養得唔錯㗎啦。」放閃放得非常有愛。
不過阿Bob當然唔係兩手空空咩禮物都冇準備，只係留低線索「新款」「可以摺」，又賣關子話要等老婆「自己講」。Bob嫂隨後喺網上晒出一部新款摺機，感謝大家向佢送上生日祝福之餘，仲話自己冇打算公開自己歲數，點知老公快過自己出Post。
阿Bob除咗家庭美滿，佢日前喺社交平台開心宣布，由佢首次擔正同 羅子溢 合作嘅劇集《警是個大佬》，即將喺12月14號晚八點半喺翡翠台播出，希望大家有時間嘅話，都可以可以睇一睇。
