台慶劇《玫瑰戰爭》嘅一眾演員 楊茜堯 陳自瑤 傅嘉莉 林夏薇 姚子羚 等齊齊現身電視城，出席劇集首播盛會行紅地氈同觀眾收睇首播。一眾粉絲帶齊應援物到場支持，令會場變成嘉年華一樣。
總監製 鍾澍佳 睇完首播後，就話感受到一眾演員對自己嘅角色處理得非常細緻，睇完第一集呢個版本後，就會發現有好多懸念，而喺每人微表情同細微動作中亦可以發現，後面仲有好多事會發生。
林夏薇、姚子羚同傅嘉莉首次現場獻唱片尾曲《大娛樂家》，子羚同茜堯都話角色與角色之間嘅鬥爭非常精彩，尤其係眼神之間嘅角力，而精彩嘅化學反應全靠默契撞出嚟，唔需要事前特別溝通，只要對手拋個波出嚟就自然會接到。
劇集演員陣容強大，除咗女子組出彩，男子組亦雲集 陳豪 陳展鵬 馬國明 三位視帝。馬明就話拍攝《玫瑰戰爭》期間，自己同時拍緊《飛常日誌II》，所以嗰段期間係由深圳同香港機場兩邊走，非常辛苦。
阿Mo雖然已經有段長時間冇同茜堯合作，不過佢話屬於舊拍檔嘅默契仲Keep到，更透露二人喺劇中有段看似密切，其實冷感嘅關係。展鵬喺劇中同Kelly一對，不過貌合神離，佢幽默表示，自己呢次演返一個人，唔似馬明同阿Mo要做娛樂大亨。
Kelly自從劇集《張保仔》之後，再度跟陳展鵬同框演出，今次仲飾演一對夫妻，再續當年嘅情誼。Kelly都好感恩有呢個機會，仲可以俾展鵬睇到自己演技進步，希望自己嘅演技可以襯得返展鵬。
《玫瑰戰爭》星期一至五晚 20:30 翡翠台